Qeveria britanike sot vlerësoi se Izraeli duhet të sigurohet se aktivitetet ushtarake izraelite kundër Hamasit janë “proporcionale” dhe shprehu shqetësim të thellë në lidhje me prishjen e zyrave të medias dhe objektivave të tjerë civilë në Rripin e Gazës.

Zëdhënësi i kryeministrit britanik Boris Xhonson, Maks Blejn tha se Britania e Madhe është “në kontakt me kolegët nga SHBA-ja dhe KB-ja dhe urgjentisht kërkon më shumë informacione nga qeveria izraelite për sulmin të shtunën kur u shkatërrua ndërtesa disa katëshe ku ishin të vendosura zyrat e Asoshieted pres dhe media tjera të huaja.

“Ne jemi thellësisht të shqetësuar për raportin e KB-së se 23 shkolla dhe 500 shtëpi, si dhe institucionet mjekësore dhe zyrat e medias, janë shkatërruar ose dëmtuar në Gaza. Izraeli duhet të bëjë çdo përpjekje për të shmangur viktima civile dhe aktiviteti ushtarak duhet të jetë proporcional”, tha Blejn.

Ai gjithashtu e shprehu shqetësimin e Britanisë se Hamasi përdor zona civile për sulme.

Izraeli pretendon se ndërtesa ku gjendeshin zyrat e mediave të huaja u përdor edhe nga Hamasi, por nuk dha prova.

Ministri egjiptian i Punëve të Jashme, Sameh Shukri, ndërkohë, paralajmëroi për rrezikun e përshkallëzimit të konfliktit midis Izraelit dhe Palestinezëve, duke u bërë thirrje të gjitha palëve të vendosnin armëpushim.

Sameh tha se Egjipti bashkëpunon me partnerë ndërkombëtarë për ta arritur këtë dhe për të filluar negociata politike që të arrihet “zgjidhje e përhershme, gjithëpërfshirëse dhe e drejtë e çështjes palestineze”.

Ai shfaqi shpresë se administrata amerikane do të bashkohet në përpjekjet e tilla për ta rifilluar procesin politik në mënyrë që të shmangen luftërat dhe shkatërrimet në rajon.

Ministri egjiptian i Punëve të Jashtme i bëri thirrje qeverisë së Izraelit t’i zvogëlojë tensionet në Jerusalem dhe t’i ndalojë përpjekjet e shpërngulësve ekstremiste hebreje për ta ndryshuar natyrën e qytetit.

Autoritetet gjermane sot e dënuan sulmin me raketa të Hamasit ndaj Izraelit dhe i bënë thirrje organizatës ekstremiste që të ndalojë menjëherë sulmet e tilla.

“Ky është një terror që synon të vrasë aksidentalisht njerëz. Qeveria gjermane qëndron pranë Izraelit dhe të drejtës së tij për ta mbrojtur popullin e saj dhe për ta mbrojtur veten, tha zëdhënësi i qeverisë gjermane, Shtefan Zajbert.

Ai vlerësoi se Hamasi i mbanë peng banorët e Gazës duke qëlluar me raketa nga zonat e populluara dendur.

Duke u përgjigjur në pyetjen për rrëzimin e ndërtesës në Gaza nga sulmet izraelite gjatë fundjavës, zëdhënësi tha se është e rëndësishme gazetarët të raportojnë nga zonat e luftës, por ai përsëriti se Izraeli ka të drejtë të vetëmbrojtjes.